Gleði og sorg í felag tey reika.
Fyrrapartin var serlig og sorgblíð hátíðarløta, tá ið seinastu prógvini í lærugreinini føroyskt sum annaðmál vórðu handað á Tórshavnar Kvøldskúla.
Meðan aldan hjá Anniku og Gunnari Hoydal so tutlandi teskaði eitthvørt í oyra, var tað sum fingu kenslurnar frítt at fara. Látur, kossar og klemm og okkurt sorgblítt tár.
Tað var Jógvan Sørin Hansen, leiðari fyri Tórshavnar Kvøldskúla, sum handaði teimum 30 næmingunum prógvið.
Føroyskt sum annaðmál er útbúgving í fleiri stigum, og dagurin í dag er søguligur, tí á fyrsta sinni hava tveir næmingar lokið alla útbúgvingina. Teir eru Murat Aba úr Turkalandi og Fernando Troleis úr Brasil. Fyri hetta avrik fingu teir serliga gávu handaða frá Tórshavnar Kommunu, og var tað sjálvur borgarstjórin, Heðin Mortensen, sum handaði gávuna.
Fernando Troleis, sum hevur búð í Føroyum í níggju ár, helt rørandi takkarrøðu undir rámandi heitinum “Eg vildi fegin hava eitt pláss við borðið”. Í røðuni legði hann millum annað dent á, hvønn týdning tað hevur fyri tilflytarar at hava góða atgongd til lærdóm í føroyskum sum annaðmál og samstundis at gera sítt til og vísa vilja at læra málið og gerast partur av føroyska samfelagnum.
Við loyvi fara vit aðrastaðni at prenta rørandi røðuna í fullum líki. Eisini fara vit at prenta røðuna, sum Heðin Mortensen, borgarstjóri, bar fram á samkomuni.
Jógvan Sørin Hansen, leiðari fyri Tórshavnar Kvøldskúla, nýtti høvið at takka starvsfólkunum á Kvøldskúlanum og fyri góða samstarvið við myndugleikar og onnur, ið hava gjørt útbúgvingina møguliga.
Somuleiðis takkaði hann undirvísarunum fyri góða og trúgva tænastu øll árini, ið Kvøldskúlin hevur staðið fyri undirvísingini í føroyskum sum annaðmál.
Tórshavnar Kvøldskúli ynskir øllum næmingunum hjartaliga tillukku við próvnum og alt tað besta framyvir.
Tórshavnar Kvøldskúli letur nú stafettina víðari, og verður tað Undirvísingarstýrið, sum fer at umsita málsøkið.
Við hesum takkar Tórshavnar Kvøldskúli fyri árini við føroyskum sum annaðmál og ynskir Undirvísingarstýrinum og skúlamyndugleikunum hepna hond frameftir.