Árligi starvsfólkadagurin fyri starvsfólk og undirvísarar á Tórshavnar Kvøldskúla var í Silo á vestarubryggju í gjár.
Dagurin er høvið hjá starvsfólkum og undirvísarum at hittast til gaman og álvara og leggja ætlanir út í kortið fyri næsta skúlaár.
Elsa Berg, borgarstjóri, og Heðin Mortensen, býráðslimur og fyrrverandi borgarstjóri, hugleiddu og bóru Kvøldskúlanum og starvsfólkum og undirvísarunum kvøðu og løgdu millum annað dent á tann ovurstóra týdning, sum Kvøldskúlin hevur fyri Tórshavnar kommunu.
Eisini løgdu tey dent á arbeiði, sum kommunan hevur sett skjøtil á til tess at útvega Tórshavnar Kvøldskúla betri karmar og umstøður.
Jógvan Sørin Hansen, skúlaleiðari, takkaði fyri skúlaárið, sum so smátt er farið at halla við góðynskjum um tað komandi.
Drigið varð lut um tvey Havnarkort. Hepnu vinnararnir gjørdust Birgit Hansen og Oddvør Petersen.
Til borðhaldið spældi Guðrun Sólja Jacobsen undir, og eisini framførdu Líggjas Olsen og Noomi Nielsen.
Veiting av vælsmakkandi matinum stóð Hotel Føroyar fyri.
Tórshavnar Kvøldskúli takkar fyri.
Fleiri myndir frá starvsfólkadegnum eru at síggja á vanga okkara á facebook.